Kryeministri Edi Rama sëbashku me Ministren Manastirliu kanë sqaruar në Berat skemën e ndihmës së plotë ekonomike.
Duke e cilësuar skemën e re një rregullim i listës së atyre që përfitonin duke mos e merituar atë, kryeministri tha se në këtë skemë bëhet kontrolli i çdo subjekti tek tatimet, hipoteka, transporti etj., në mënyrë që të skualifikohen ata që e përfitojnë padrejtësisht.
“Ka një pjesë minimale, që është marzhi i gabimit të sistemit, që ne po e verifikojmë dhe të gjithë ata që pas verifikimit do të rezultojnë të përjashuar jo për shkak të abuzimit, por të sistemit, do të riintegrohen”, u shpreh Rama.
Ministrja Manastirliu shpjegoi se cili do të jetë roli i pushtetit vendor në këtë proces.
“Grupet e punës të administratorëve socialë të bashkive, të inspektorëve të Shërbimit Social dhe ata të prefekturave po shkojnë në çdo familje, edhe tek ata që e kanë përfituar ndihmën, duke verifikuar çdo familje”, deklaroi Manastirliu.
Ndihma ekonomike i akordohet përfituesve për një afat 5-vjeçar dhe kombinohet me shërbimet sociale.
***
Po ashtu, ministrja e Shëndetësisë dhe Mbrojtjes Sociale Ogerta Manastirliu vizitoi spitalin rajonal të Beratit, ku sot ka nisur punën një mjeke kardiologe nga Qendra Spitalore Universitare Nënë Tereza përmes programit të bonusit të Ministrisë së Shëndetësisë dhe Mbrojtjes Sociale.
“Ne po zbatojmë 2 programe shumë të rëndësishme për të plotësuar mungesat e mjekëve specialistë në spitalet rajonale, patronazhimin dhe bonusin, për ta sjellë shërbimin aty ku janë nevojat. Jemi sot në Spitalin Rajonal të Beratit me dr. Eritinka Shuperken, e cila ka ardhur nga Qendra Spitalore “Nënë Tereza” për të punuar me kohë të plotë 24/7 në Spitalin Rajonal të Beratit përkundrejt pagesës së bonusit. Sigurisht kjo është një zgjidhje e qëndrueshme që zgjidh edhe urgjencat kardiologjike për gjithë këtë zonë”, u shpreh Ministrja e Shëndetësisë dhe Mbrojtjes Sociale.
Sipas znj. Manastirliu, plotësimi i boshllëqeve të krijuara për shkak të politikës së gabuar të bllokimit të specializimeve 4 vite më parë nuk mund të zgjidhen me një të rënë të lapsit por politikat incenivuese të qeverisë siç është bonusi deri në 2.5 milion lekë plus pagën, për të nxitur mjekët të punojnë në spitalet ku ka nevoja për specialistë, po japin rezultate.
