Në Hagë në datë 6 dhe 7 shtator u zhvillua takimi i Shefave të Policive Evropiane, mbajtur në selinë e EUROPOL, ndërsa i pranishëm ishte drejtori i Policisë së Shtetit, Haki Çako.
Në takim u diskutua për çështje kryesore lidhur me sigurinë e BE-së dhe më gjerë, përfshirë: përhapjen në Internet të propagandës ekstremiste, terroriste dhe të dhunshme dhe reagimin e ligjzbatuesve; përdorimin e inteligjencës financiare si një mjet kritik për hetimet e suksesshme kundër terrorizmit dhe krimit të organizuar; krimin në epokën e teknologjisë; krimin kompjuterik; dhe kontrabandimin e emigrantëve.
Por me interes nga Haga pritej takimi dhe diskutimi i Çakos me drejtuesit e policisë holandeze për luftën kundër bandave shqiptare, që u bë shkak edhe për raportin për vizat.
Sipas njoftimit të policisë së shtetit, në qendër të diskutimeve me delegacionin e policisë holandeze ishte intensifikimi i bashkëpunimit policor dypalësh, së pari në luftën ndaj krimit të organizuar, sidomos të organizatave kriminale shqipfolëse të cilat operojnë kryesisht në trafikimin e lëndëve narkotike (kokainë) nga Holanda në drejtim të vendeve të tjera evropiane; së dyti në identifikimin dhe kapjen e personave në kërkim ndërkombëtar, të cilët fshihen në territorin holandez.
Homologët holandezë, sipas njoftimit janë angazhuar në një shkëmbim më të lartë informacioni me palën shqiptare, ndërsa u dakordësua ngritja e grupeve hetimore të përbashkëta për të luftuar bandat.
Pak ditë më parë në një raport të publikuar nga mediat në Holandë, theksohej se autoritetet e këtij i kanë kërkuar qeverisë që të rikthejë vizat për shqiptarët, pasi kanë rritur nivelin e kriminalitetit.
Vizat, Franca: Është ulur numri i azilkërkuesve shqiptarë
E ndërsa pak ditë më parë në një shkrim të publikuar nga gazeta franceze “Le Figaro” theksoj se Parisi mund të kërkojë rikthimin e vizave për shkak se është rritur numri i azilkërkuesve nga Shqipëria.
Ndërsa sipas policisë së shtetit, Jean – Philippe Lecouffe, Drejtor i Policisë Gjyqësore në Xhandarmerinë Kombëtare Franceze deklaroi se “Bashkëpunimi me Policinë Shqiptare ka sjellë rënien e numrit të shtetasve shqiptarë që kërkojnë azil në Francë”.
Ndërsa bashkëpunimi ndërpolicor u diskutua dhe lidhur me goditjen e grupeve kriminale shqipfolëse të cilat operojnë në territorin francez, duke dakordësuar ngritjen e grupeve hetimore të përbashkëta, me qëllim hetimin, dërgimin para organeve të drejtësisë të autorëve të këtyre veprave penale, si dhe sekuestrimin dhe konfiskimin e aseteve kriminale që burojnë prej tyre.
Gjithashtu Çako zhvilloi takime edhe me përfaqësues të Italisë, Greqi dhe Spanjës.
Në qendër të diskutimeve me palën italiane ishte rritja e bashkëpunimit dypalësh, përkatësisht: në luftën kundër krimit te organizuar dhe trafiqeve te ndryshme, sidomos ato të lëndëve narkotike në kufirin midis dy vendeve; në vazhdimin dhe intensifikimin e monitorimit të territorit lidhur me kultivimin e lëndëve narkotike; në lidhje me personat në kërkim ndërkombëtar që fshihen në territoret e shteteve respektive, etj.
Në takimin me delegacionin e policisë greke u diskutua bashkëpunimi në luftën kundër trafiqeve të ndryshme ndërkufitare, sidomos të narkotikëve: në lidhje me masat e marra për parandalimin e flukseve migratore (veçanërisht ato të vendeve të treta të cilat kanë si trend lëvizjen nga Greqia për në vendet e BE-se duke tentuar të kalojnë edhe nëpërmjet kufirit Shqiptar).
Gjatë takimit të zhvilluar me delegacionin e policisë spanjolle u diskutua rritja e bashkëpunimit në identifikimin dhe kapjen e personave në kërkim ndërkombëtar që fshihen në territorin spanjoll: në luftën kundër krimit të organizuar dhe krimeve të tjera, duke realizuar edhe operacione të përbashkëta ndërpolicor: në identifikimin e kontingjentit kriminal shqipfolës, etj.
Shqipëria lobon për Kosovën në INTERPOL
Në të gjitha takimet dy palëshe të zhvilluara nga delegacioni shqiptar, u kërkua mbështetja e partnerëve tanë në lidhje me anëtarësimin e Kosovës si shtet anëtar i organizatës ndërkombëtare policore INTERPOL, pasi së shpejti në Pekin do të zhvillohet Konventa e Interpolit, ku do të diskutohet dhe votohet anëtarësimi i Kosovës dhe Palestinës në këtë organizatë.
