Mungesa e investimeve të banorëve që jetojnë në to, por edhe amortizimi që vjen prej viteve, ka bërë që një pjesë e banesave të ndërtuara në kryeqytet të vetëshkatërrohen dhe të kthehen në një rrezik edhe për qytetarët.
Siç mund të shihni edhe nga këto foto, brezat e drurit që mbanin këto mure janë kalbur totalisht, duke sjellë dhe shembjen e murit të bërë me tulla balte të cilat nga vitet janë shkërmoqur. Nga dëmtimi janë prekur jo vetëm muret rrethues, por edhe banesat të cilat në jo pak raste kanë sjellë dhe dëmtim të shtëpive përreth apo të automjeteve që kanë qenë të parkuara.
Në shumë raste, banorët e zonës kanë kërkuar ndihmën e Policisë së Shtetit dhe të Inspektoriatit Ndërtimor për të bërë të mundur heqjen e asaj që ka mbetur nga vetëshkatërrimi i këtyre banesave dhe shkatërrimin e kontrolluar të pjesës tjetër.
Shtëpia tiranase ndërtohej me qerpiç dhe me breza druri . Qerpiçi, (tullat e baltës të thara në diell), përgatitej në vendin e ndërtimit me kallëp druri. Ato lidheshin me llaç balte të përzierë me kashtë. Në vitet ‘20 të shekullit XX, tipi i shtëpisë tiranase pushoi së ndërtuari, pasi nuk mund t’i adaptohej më zhvillimit, dhe kërkesave të kohës. Për më tepër, ligji i bashkive, i vitit 1922, ndalonte ndërtimin e shtëpive me qerpiç.
Ndërkohë, studimet e ekspertëve të sizmologjisë tregojnë se shtëpitë e ndërtuara me qerpiç janë më të rrezikuarat në rast të një tërmeti. Sipas studimeve, objektet e ndërtuara me qerpiç janë më të rrezikuara. Objektet e ndërtuara para vitit 1960 nuk kanë rezistencë ndaj tërmeteve.
Në vitin 2014, rreth 200 familje të njësisë Nr. 8 në shkuan deri në Gjykatën Kushtetuese me pretendimin se shtëpitë e tyre me qerpiç, njëkatëshe rrezikonin shembjen. Deri më tani nuk është shënuar asnjë viktimë, por nëse gjendja do të vijojë të jetë e pandryshueshme, nuk do të jetë e largët dita kur rrënojat mund të zënë poshtë banorë që jetojnë në këto shtëpi apo kalimtarë të rastësishëm. /a.ç
