Në kuadër të ditës në qark, Zëvendës Kryeministrja Senida Mesi ka zhvilluar sot një seri takimesh pune në Elbasan. Fillimisht ajo është pritur në zyrë nga Kryetari i Bashkisë Elbasan Qazim Sejdini, me të cilin ka diskutuar për projektet e ardhshme në zhvillimin e qytetit të Elbasanit.
E shoqëruar nga Prefekti i Qarkut Elbasan Maksim Malaj dhe deputetët Evis Kushi e Arben Kamami, Zëvendës Kryeministrja Mesi ka vazhduar axhendën me një forum të hapur në Fakultetin e Ekonomisë të Universitetit “Aleksandër Xhuvani” Elbasan, ku ka bashkëbiseduar me studentë dhe akademikë për prioritetin e qeverisë shqiptare në lidhje me reformën në shërbimet administrative, në qendër të së cilës është qytetari e sipërmarrja. Ajo ka ndarë me to ecurinë e kësaj reforme, si dhe ka mirëpritur mendime e sugjerime për sa i përket kësaj reforme.
Mesi ka vijuar më tej me një inspektim për shërbimet dhe problematikat e Zyrës së Regjistrimit të Pasurive të Paluajtshme (ZRPP) Elbasan, nisur edhe nga fakti se kjo është një nga drejtoritë me ngarkesë të madhe pune. Gjatë inspektimit, Znj. Mesi ka nënvizuar se është shumë e rëndësishme që qytetarët t’i marrin shërbimet në kohë e në cilësinë e duhur duke vënë theksin gjithashtu tek reforma në shërbimet publike, e cila kontribuon direkt në standardizimin e shërbimeve, uljen e korrupsionit dhe rritjen e transparencës.
Axhenda e Zëvendës Kryeministres Mesi në Elbasan ka vijuar gjithashtu edhe me një vizitë pranë një biznesi fason, ku është njohur nga afër me kushtet dhe standardet e punës. Gjatë vizitës, Znj. Mesi ka bërë me dije gjithashtu lehtësitë burokratike që janë arritur deri më tani për sipërmarrjen në kuadër të reformës në shërbimet administrative, proces i cili vazhdon dhe është në rrugë të mbarë.
