U përkujtua sot 25-vjetori i krijimit të një prej strukturave më të rëndësishme të Forcave tona të Armatosura, siç është Policia Ushtarake, e cila ka mision sigurimin dhe ruajtjen e pjesëtarëve dhe pasurive ushtarake, mbajtjen e rregullit dhe disiplinës dhe zbulimin e veprave penale ushtarake.
Në ceremoninë e zhvilluar me këtë rast në mjediset e kësaj njësie, ishte e pranishme ministrja e Mbrojtjes, Mimi Kodheli, zëvendësshefi i Shtabit të Përgjithshëm të FA, gjeneral brigade Dedë Prenga, komandantë të forcave, deputetë të Kuvendit, ish – drejtues të PU dhe të ftuar të tjerë.
Në fjalën e saj ministrja Kodheli e konsideroi Policinë Ushtarake si një nga strukturat elitare të FA dhe vlerësoi punën dhe misionin e saj përgjatë këtyre 25 viteve, ku veçoi angazhimin e kësaj njësie gjatë luftës në Kosovë. “Duke hedhur vështrim në historinë 25 – vjeçare, shohim se të gjithë kemi shumë arsye të ndihemi krenarë me sukseset e arritura. Angazhimi i Policisë Ushtarake gjatë luftës së Kosovës ishte “kudhra” që e kaliti këtë njësi cilësore pasi ajo mbajti barrën e pritjes, shoqërimit, ruajtjes dhe kujdesit për refugjatët në kampet e ngritura për ta”, tha ministrja Kodheli.
Ajo gjithashtu vlerësoi kontributin e Policisë Ushtarake në misionet jashtë vendit, si dhe përmendi modernizimin dhe rritjen e kapaciteteve që kjo strukturë ka pësuar vitet e fundit. “Ajo është sot një nga strukturat më elitare të Forcave tona të Armatosura që merr pjesë jo vetëm në operacione brenda vendit por edhe në menaxhimin e krizave botërore përkrah aleatëve. Vitet e fundit pajisja dhe modernizimi i Policisë Ushtarake ka përmirësuar dukshëm kapacitetet duke e pajisur këtë njësi me armatim, mjete dhe teknologji bashkëkohore.”- u shpreh ministrja Kodheli, e cila falënderoi partnerët ndërkombëtarë për mbështetjen, si dhe vlerësoi angazhimin e Policisë Ushtarake gjatë emergjencave.
Më tej ajo shprehu vullnetin e saj për të vijuar mbështetjen për këtë strukturë edhe me investime konkrete. “Si ministre e Mbrojtjes do vijoj të mbështes me të gjitha mundësitë Policinë Ushtarake sikurse dhe forcat e tjera me qëllim lartësimin e tyre në përmbushje të detyrimeve tona ndaj atdheut. Falë investimeve të Ministrisë së Mbrojtjes, këtë vit është planifikuar plotësimi i kësaj trupe edhe me mjetet e blinduara të transportit.”- tha ministrja Kodheli, e cila e mbylli fjalën e saj duke uruar gjithë pjesëtarët e Policisë Ushtarake, por në veçanti ata që prej dy muajsh janë të dislokuar në operacionin ”Resolute Support Mission” në Kabul të Afganistanit.
Ministrja Kodheli dorëzoi për dy nga ish – drejtuesit e Policisë Ushtarake gjeneral brigade në pension Bajram Malaj dhe kolonel në rezervë Piro Lutaj “Medaljen e mirënjohjes”, për lartësimin e figurës së ushtarakut, ndërkohë që zëvendësshefi i Shtabit të Përgjithshëm të FA gjeneral brigade Dedë Prenga e vlerësoi këtë njësi me medaljen “Repart i Shquar”.
