Muhamet Lici, 25-vjeçari i arrestuar si pjesë e një grupi kriminal gjobvënësish ndaj tregtarëve dhe bizneseve në Shkodër, është djali i kryetarit të Partisë Mendimi i Djathtë Liberal, njëkohësisht dhe anëtar i këshillit bashkiak të Shkodrës, Mustafa Lici.
Panorama shkruan se në zgjedhjet parlamentare të 2013, Mustafa Lici ka kandiduar per deputet në Shkodër, pasi ishte ne listen e PS.
Mustafa Lici, anëtar i Këshillit Bashkiak Shkodër, rezulton i dënuar në 2007 dhe në 1985 për plagosje e lehtë me dashje, ndërsa është ndaluar nga policia 4-5 herë nga viti 1990-2016.
Edhe djali i tij i vënë sot në pranga nga Policia e Shkodrës, së bashku me 6 persona të tjerë, rezulton të jetë i dënuar me 4 vjet e 8 muaj burgim për veprën penale të “Prodhimit dhe mbajtjes pa leje të armëve dhe municioneve luftarake”.
Ai konsiderohet deri më tani si “kapoja” e bandës që vendoste gjoba ndaj 200-300 tregtarëve në Shkodër, duke i marrë në formë “takse” 1 mijë deri në 3 mijë lekë të rinj në muaj secilit prej tyre, në një veprimtari të paligjshme që dyshohet nga Prokuroria se ka zgjatur të paktën 4 muaj.
