Një defekt në rrjetin e kanalizimeve i sinjalizuar nga banorët e zonës së Freskut në rrugën “Aleksandër Marteli” në Shkozë, ka vënë në lëvizje menjëherë UKT për zgjidhjen e problemit.
Gjatë gjithë natës, mjetet e rënda të UKT si dhe specialistët realizuan në kohë rekord punimet për riparimin e defektit dhe hapjen e qarkullimit për automjetet.
Si pasojë e mosvënies dorë prej vitesh, rrjeti në këtë zonë ishte tepër i amortizuar ndërkohë që edhe lidhjet e paligjshme kishin krijuar probleme në furnizimin me ujë të pijshëm të banorëve të kësaj zone.
Ujësjellësi i Tiranës fton gjithë qytetarët që të telefonojnë në çdo kohë në numrin pa pagesë 0800 44 88 për të raportuar çdo rast defekti në rrjet, ndërhyrje të paligjshme apo shpërdorimi të ujit të pijshëm nga persona të papërgjegjshëm.
Rritja e kapaciteteve të transmetimit të ujit nëpërmjet ndërtimit të linjave të reja që janë ndërmarrë në të gjithë territorin e bashkisë Tiranë dhe zëvendësimi i atyre ekzistuese që janë dëmtuar nga qytetarët që kanë bërë lidhje të paligjshme ose si rezultat i amortizimit prej mosvënies dorë prej vitesh, kanë eliminuar humbjet në rrjet dhe kanë përmirësuar cilësinë e shërbimit ndaj qytetarëve. /a.ç
