Një dimër më i mirë për kullimin dhe një verë më e mirë për vaditjen në Divjakë. Afro 15 mijë fermerë të kësaj zone do të përfitojnë nga rehabilitimi i sistemit ujitës Murriz-Thanë, dega Krutje, pjesë e skemës së qeverisë nga e cila kanë përfituar 59 bashki.
“Ka mbaruar e gjithë dega e Krutjes, kanalet kryesore dhe sekondare, betonim dhe riparim i betonit ekzistues. Kemi ndërtuar të gjithë veprat ujitëse. Investimi ka qenë fitimprurës për fermerët. Vaditja është zgjeruar akoma më shumë këtë vit,” shprehet inxhinieri i projektit.
“Janë hapur 6 mijë ha që vaditen me kanalet e dyta që janë 155 km,” tha kryetari i Bashkisë së Lushnjes, Fatos Tushe.
Në sajë të kësaj ndërhyrjeje pritet të marrë fund njëherë e mirë, verën e ardhshme, problemi i ujitjes për afro 7600 ha sipërfaqe bujqësore në Këmishtaj, Mërtish, Korije, Gjazë, Kamçisht, etj..
“Ndërhyrjet janë jo vetëm në kanalin kryesor, por edhe në gjithë kanalet sekondare. Janë rreth 15 mijë banorë që përfitojnë, projekt i Bankës Botërore. Ndërkohë tani, lajmi i mirë për zonën është që kanë filluar procedurat për të prokuruar edhe disa teprica të mbetura nga projekti që do jetë vazhdim i degës së Krutjes. Do futen edhe 4600 ha të tjerë,” deklaroi ministri i Bujqësisë dhe Zhvillimit Rural,, Niko Peleshi.
Investimi prej 6 milionë eurosh synon rehabilitimin tërësor dhe të qëndrueshëm të sistemit të vaditjes e kullimit, duke përfshirë rehabilitimin e kanaleve kryesore dhe sekondare, veshjen me beton dhe hekur së skarpateve në zonat me rrezikshmëri të rrëshqitjes, ndërtimin e strukturave të matjes së ujit dhe të kontrollit të niveleve.
Rruga Divjakë
Unaza bujqësore e Lushnjes prej 46 kilometrash është drejt përmbylljes. Segmenti i fundit i saj prej 5 kilometrash që lidhin Divjakën me autostradën është në prag të përfundimit, duke mbyllur lidhjen me rrugë të standardeve dhe duke lehtësuar daljen në treg të produkteve të një prej zonave më bujqësoret e vendit. “Ky është 5 kilometërshi i fundit që lidh 46 kilometra unaza bujqësore, pra rrugën që kemi bërë mes për mes Tërbufit edhe kjo tani që e lidh autostradën me qytetin. Kjo është parashikuar në ndërtimin edhe të trotuareve, edhe të pistës së biçikletave në vazhdimësinë e të gjithë shëtitoreve që kemi bërë në Bashkinë e Divjakës,” u shpreh kryetari i Bashkisë Divjakë, Fredi Kokoneshi.
Ky segment përmbyll edhe aksin turistik të Divjakës nga rreth-rrotullimi deri në zonën e plazhit, ku ndër të tjera përfshihet edhe një ure të re në zonën e Shën-Premtes.
Kisha e Shën Thanasit, Karavasta e re
Kisha e Shën Thanasit në luginën e Karavastasë, monument kulture prej 64 vitesh, nga degradimi ku ishte harruar, ka rifituar vlerat dhe identitetin e saj. Kisha e Shën Thanasit i është nënshtruar rikonstruksionit të plotë në përputhje me vlerat arkitekturore dhe historike që ajo bart.
“Kisha është shumë e hershme, është e shekullit 17-18 dhe saktë fare 1781 është bërë inaugurimi,” u shpreh prifti i kësaj kishe.
“Kjo është e vetmja kishë që nuk ka të përsëritur 2 herë të njëjtën fytyrë. Të gjitha fytyrat që janë këtu, nuk përsëriten asnjëherë,” tha deputeti Erjon Brace.
Nga çatitë që vareshin për shkak të depozitimit të mbeturinave, dyshemesë dhe mureve të rrënuara, sot, Kisha e Shën Thanasit tërheq mjaft vizitorë vendas e të huaj jo vetëm me historinë, por edhe me pikturat murale të trashëguara nga familja grabovare Çetiri, të cilat janë restauruar me mjaft mjeshtëri nën kujdesin e restauratorit Mustafa Arapi.
