Kandidatja e PS-së në qarkun e Gjirokastrës, Mirela Kumbaro ka zhvilluar në Janinë një seri takimesh me dropullitë, libohovitë dhe përmetarë të cilët jetojnë në shtetin fqinj. Kumbaro, e cila në takime shoqërohej edhe nga dy kandidatet e tjera, Elvira Pasho dhe Artemis Dralo vuri theksin tek disa nga transformimet kryesore të tre viteve të fundit, për secilën bashki duke nisur nga infrastruktura, rilindja urbane e qendrave, investimi i energjisë elektrike në Dropull, investimi për unazën e Pogonit, nisja e punimeve për gjithë rrjetin e ri të ujësjellësit të Përmetit me vlerë 4 milionë euro etj.
Në takimin e përbashkët zhvilluar me libohovitët e dropullitët Kumbaro vuri theksin tek investimet që ka hedhur në këto dy bashki qeveria e PS-së dhe sesi kjo ka ndikuar tek emigrantët për tu kthyer dhe për të investuar në turizëm.
“Në Përmet p.sh kemi një djalë të ri që ka ardhur nga Londra dhe sapo ka hapur një hotel, vetëm duke parë prirjen turistike të qarkut dhe, prirja turistike nuk është me turistë që rrinë 24 orë. Ne duam të kemi grupe që rrinë deri në 10 ditë në qark, duke dalë nga qyteti dhe duke shkuar drejt Zagorisë, drejt Lunxhërisë, duke shkuar në Labovë, në Dropull, në Çarçovë që janë të gjitha zona turistike me potencial tërësisht të pashfrytëzuara”, tha ajo.
Më tej Kumbaro pohoi se të shtata bashkitë e qarkut sot janë kthyer në shtatë kantiere të mëdha të programit të madh të rilindjes urbane. Ajo u ndal edhe tek investimi i fundit i qeverisë për sistemin e energjisë në Dropull dhe investimet në infrastrukturë.
“Shumë dropullitë më thonin nuk shkojmë dot në shtëpi se nuk ndezim dot frigoriferin, në Bulo ku nuk shkoje dot katër vjet më parë, sot kemi një rrugë fantastike. Labova, është sot një nga krenaritë e bashkisë Libohovë. Dhe vendimi më i fundit i kryeministrit Edi Rama është vendimi për ndërtimin e unazës së Pogonit, investimi më i rëndësishëm jo vetëm për banorët e emigrantët, por për të tërhequr turistët dhe kjo do të lidhet më vonë me Zagorinë si një nga zonat më të bukura në Shqipëri, sidomos për të zhvilluar agroturizmin”, tha Kumbaro.
Ndërsa përmetarëve që jetojnë në Janinë, Kumbaro iu drejtua duke iu thënë se vota e tyre vlen më shumë sesa një kartmonedhë me vlerë 50 euro, ndaj ata nuk duhen të joshen nga propozime të turpshme.
“Nuk duhet të jepet vota kur dikush kërkon ta blejë atë me një kartmonedhë 50 euro. Ky është turp dhe përmetarët kanë shumë më tepër dinjitet sesa 50 euro. Përmetarët meritojnë Përmetin, meritojnë investimet, meritojnë zhvillimin. Nuk mund dhe nuk duhet të jepet vota për një qokë të një dite, por duhet që vota të jepet për një program që mendon për të gjithë. Prandaj ju kërkoj që në datën 25 qershor të ktheheni dhe të votoni numrin 2 dhe Partinë Socialiste”,- theksoi Kumbaro.
Kandidatja e PS-së më tej u tha emigrantëve se këtë vit zgjidhet përfundimisht edhe problemi i madh i Përmetit, me investimin prej 4 milionë euro për ndërtimin e ujësjellësit të ri të qytetit.
ma.me
