Konferenca e shtypit e presidentit Meta, e njoftuar prej disa orëshe, ka pësuar një ndryshim të vogël: në vend te kreut të shtetit kanë dalë para mediave keshilltari i tij ligjor dhe zëdhenesi.
Duket se ky spostim vjen pas vizites se sotme te shefes se ambasades amerikane ne Tirane, e cila vizitoi zyren e Ilir Metes per rreth 90 minuta.
Këshilltari juridik i Metës Bledar Dervishaj , ka dalë në media për të sqaruar sërish vendimin për shfuqizimin e dekretit për zgjedhjet e 30 Qershorit.
“Presidenti ka ndjekur me vëmendje të gjitha diskutimet që u zhvilluan sot në parlament, ku u diskutua vendimmarrja për zhdekretimin e 30 Qershorit. Në vend të një reflektimi dhe në vend që të ishte një moment ku mund të shfaqej një reflektim apo ku mund të diskutohej për zgjidhjen e krizës, sot u lëshuan lumenj fyerjesh ndaj institucionit të Presidentit.
Kjo retorikë nuk i shërben zgjidhjes së krizës dhe paqes sociale. Presidenti thekson para shqiptarëve dhe partnerëve se dekreti për shfuqizimin u mor në mbështetje me dispozitat Kushtetuese. Ky akt është marrë bazuar te argumentet Kushtetuese. Ai është në fuqi dhe i detyrueshëm për zbatim nga të gjithë.
KQZ është e detyruar ta zbatojë, cdo vendim tjetër është i patolerueshëm nga ligji. Cdo parti që e kundërshton është e lirë të ngrejë pretendimet në gjykatën Kushtetuese apo tjetër që vlerëson se mund të zgjidhë cështjen”.
