Të premten Barcelona njoftoi në faqen e saj në internet se kishte arritur marrëveshjen për blerjen e Dembele mbi bazën e 105 mln eurove plus të tjera bonuse nga Dortmund-i.
Një lajm shumë i gëzuar për tifozët katalanas që më në fund shohin një “top-player” teksa afrohet në klubin e tyre, por radhën për t’u mërzitur e kishin ata të Dortmund. Në takimin e djeshëm që verdhezinjtë luajtën kundër Hertha Berlin në “Sigal Iduna Park”, tifozët nuk nguruan të shfaqnin zemërimin për të sapolarguarin Dembele.
Në shkallët e stadiumit një tifoz është fotografuar teksa mbante veshur fanellën e francezit dhe në të shkruante “kush dreqin është Dembele”.
Kishte edhe nga ata që ishin të lumtur për këtë transferim. Një tjetër tifoz jashtë stadiumit mbante veshur fanellën e 20-vjeçarit dhe në vend të emrit kishte shënuar shumën e transferimit që pagoi Barcelona, duke nënkuptuar se kishin dalë të fitura nga kjo marrëveshje.
Kujtojmë se Dortmund para dy vitesh pagoi vetëm 5 mln euro për t’a blerë Dembele nga Rennes, ndërsa të premten firmosi një kontratë ku do të përfitojë rreth 148 mln euro nga shitja e tij.
