Një tjetër kënd force është përuruar në Liqenin Artificial nga kryebashkiaku Veliaj. Kreu i Bashkisë së Tiranës tha se këndi për të rriturit është një alternativë ndaj kafeneve dhe llototve të bastit.
“Çdo ditë shohim një ndryshim te Liqeni, jo vetëm mjedisi është më i pastër, por tani është edhe më çlodhës. Mënyra se si vërtetohet kjo është prania e 275 mijë qytetarëve të Tiranës që e frekuentojnë rregullisht këtë hapësirë. Kjo na bën të kuptojmë se, siç fëmijët kanë nevojë për kënde lojërash (në të gjithë Tiranën kemi bërë rreth 10 të tillë), ashtu edhe të rriturit kanë nevojë për një kënd ku mund të ushtrohen fizikisht në natyrë, për pistë vrapimi apo biçikletash… Me këtë kënd force propozojmë një alternativë ndryshe nga interneti, bingot, bastet dhe kafet; një hapësirë në natyrë, në ajër të pastër, me të gjitha kushtet, si një palestër në ajër të hapur, e cila mund të shijohet nga të gjithë qytetarët e Tiranës, frekuentues të Parkut të Liqenit”, tha ai.
Drejtori i Agjencisë së Parqeve dhe Rekreacionit, Blendi Gonxhe, tha se Parku i Madh i Liqenit është hapësira më e vizituar nga qytetarët e Tiranës.
“Parku ka shërbim në të gjithë pjesët e tij, ka më shumë zona të kufizuara për qarkullimin e mjeteve, ka më shumë liri për qytetarët që të frekuentojnë zonat e pashkelura më parë, ka më pak mbetje, ka më pak errësirë dhe më shumë ndriçim, falë edhe bashkëpunimit me ndërmarrjet e tjera të bashkisë. Ky kënd është simbol i një rekreacioni aktiv, çlodhje, streçing, në shëtitoren kryesore të parkut, për një panoramë të mrekullueshme dhe për edukatë fizike e jetese të re”, theksoi Gonxhe.
