Kryetari i Bashkisë së Tiranës Erion Veliaj i është përgjigjur kreut të PD-së Lulzim Basha lidhur me ndërtimin e shkollës së re në Kodër Kamëz. Përmes një postimi në tëitter, kryebashkiaku Veliaj deklaron se këto qëndrime të PD-së vijnë nga ata që në katër vite që drejtuan Bashkinë e Tiranës nuk ndërtuan asnjë shkollë.
Veliaj shpreh bindjen se Kodër-Kamza do ketë një shkollë të shkëlqyer si Kosova a Liceu, ku nuk do ketë asnjë njeri më si kontigjent për mitingjet e dhunës. “Normal që ndryshon qëndrim, dhe ai dhe dhëndri që vetë e firmosën! Në 4 vjet nuk ndërtuan ASNJË shkollë! Plus, nëse Kodër-Kamza do ketë një shkollë të shkëlqyer si Kosova a Liceu, nuk do ketë asnjë njeri më si kontigjent për mitingjet e dhunës”, shkruan Veliaj.
Por, pavarësisht deklaratave, ndërtimi i shkollës së re në Kodër-Kamëz daton që në vitin 2013, në Planin Urbanistik të Bashkisë së Tiranës hartuar nga Lulzim Basha, dikur kryetar bashkie, e sot kryetar i PD-së, që lëshon akuza kundër qeverisë dhe bashkisë së Tiranës.
Madje, jo vetëm kaq, por shkolla parashikohej të ndërtohej pikërisht në të njëjtin vend ku sot PD-ja proteston kundër ndërtimit të saj.
Por, më i çuditshëm është edhe fakti se Plani Urbanistik i vitit 2013 i Bashës ka marrë më parë pëlqimin dhe miratimin e vetë Jamarbër Malltezit, i cili ka bërë vlerësimin e ndikimit mjedisor të atij plani. Pra, dhëndri i Berishës, në vitin 2013 jepte OK-in për ndërtimin e shkollës në të njëjtin vend në Kodër-Kamëz, kurse sot e kundërshton këtë projekt, të firmosur po nga ai vetë, disa vite më parë.
