Instituti për Demokraci, Media dhe Kulturë (IDMC) në bashkëpunim me Ministrinë e Mirëqënies Sociale dhe Rinisë dhe Ambasadën Gjermane zhvilluan sot tek Qendra Rinore e Tiranës shpalljen e konkursit kreativ “Born in 90’ – Explore the past, create the future”. Konkursi kryhet në kuadër të 25 vjetorit të ndryshimeve demokratike në Shqipëri.
Në fjalën e saj përshëndetëse, drejtoresha e IDMC-së, Jonila Godole, theksoi se ka ardhur momenti që shoqëria shqiptare të merret në mënyrë më intensive me të shkuarën, dhe këtë mision mund ta paraprijnë të rinjtë që janë rritur në vitet e tranzicionit dhe nuk vuajnë nga komplekset. Godole i njohu të pranishmit me kushtet e pjesëmarrjes si dhe mënyrën e aplikimit në tre kategori: multimedia, arte figurative, ese dhe letërsi.
Konkursi sipas saj ka ngjallur në kaq pak kohë shumë interes te të rinjtë brenda dhe jashtë vendit që kanë kaluar fëmijërinë e tyre në Shqipërinë e tranzicionit.
Ndërsa zv/ministrja e Mirëqënies Sociale dhe Rinisë, Gentjana Sula ndau me të pranishmit përjetime personale në lidhje me periudhën e komunizmit dhe u dha të rinjve “porosinë” të mos e harronin të shkuarën.
Ambasadori gjerman në Shqipëri, Hellmut Hoffman u shpreh entuziast për rolin e të rinjve në ballafaqimin me të shkuarën. Ai deklaroi se shpallja e fituesve të këtij konkursi do të bëhet në kuadër të Tetorit Gjerman.
Shkrimtari dhe gazetari Fatos Lubonja në fjalën e tij përshëndetëse inkurajoi të rinjtë të konkurronin dhe të thelloheshin në trajtonin e temave që do të zgjedhin për konkursin.
Afati i dorëzimit të punimeve do të jetë data 5 Tetor 2015, ora 24:00. Të rinjtë ftohen të konkurrojnë me projektet e tyre në një nga zhanret e mëposhtme: Ese & Letërsi, Multimedia dhe Arte Figurative.
Punimet do të vlerësohen nga një juri profesionistësh që do të bëhet e njohur gjatë ceremonisë, më 9 Qershor 2015, ora 10.30 në Qendrën Rinore, Rruga e Kavajës.
