Lulzim Basha ka falenderuar militantët e tij që janë bërë pjesë e protestave të fundit të opozitës joparlamentare. Kreu i PD u shpreh se mes pjesëmarrësve ka pasur shumë socialistë, që siç tha Basha, ka patur rastin t’i takojë personalisht dhe të bisedojë me ta.
“Dua të falenderoj edhe rininë që ishin shpirti i protestës, si dhe ata që erdhën nga çdo skaj i Shqipërisë” – tha kryedemokrati.
Basha pati dhe një koment për vendimin e opozitës në vijim. Ai ka refuzuar sërisht thirrjet për dialog duke u shprehur se nuk ka hapa pas.
“Nuk do të ketë asnjë hap pas, por vetëm përpara. Marshimi ynë i djeshëm ishte një marshim shprese” – tha Basha në takim me gazetarët.
Ai tha se ka komunikuar me partnerët strategjikë të cilët sipas tij, janë gati të angazhohen për ta zgjidhur krizën.
“Por shkaktari i kësaj krize po përpiqet në fshehtësi që ta shtrijë këtë krizë edhe në rajon. U kam thënë miqve se e mirëpres zgjidhen e krizës politike me ndërmjetësimin e tyre. Opozita dhe Partia Demokratike janë gati ta zgjidhin krizën me ndihmën e partnerëve ndërkombëtar” – deklaroi Lulzim Basha.
Ai u shpreh se nuk ka qenë asnjëherë mik i Edi Ramës, duke iu përgijgjur kështu ironisë së këtij të fundit.
“Edi Rama i ka zgjedhur miqtë e tij. Disa janë oligarkë dhe pronarë mediash. Kjo nuk është një betejë mes meje dhe atij. Atë e kanë mundur mashtrime dhe krimi. Përdhunuesi i zgjedhjeve nuk mund të jetë mbikqyrësi i tyre. Edhe socialisti më i thekur nuk do të besonte se të pranosh të bësh zgjedhje me Edi Ramën, është zgjidhje parimore” – u shpreh kreu i PD. (JavaNews/a.rada)
