Vonesa në Aeroportin “Adem Jashari”, acarohen pasagjerët

Për shkak të vonesave të fluturimeve dhe zhurmës së madhe në Aeroportin Ndërkombëtar “Adem Jashari”, mes pasagjerëve dhe agjencive për fluturime janë shkaktuar acarime të shumta. Frekuentimi masiv në aeroportin e Prishtinës në këtë kohë ndodh edhe për shkak të sezonit festiv, kohë kur bashkatdhetarët nga diaspora vizitojnë Kosovën gjatë festës së Vitit të Ri. Sipas reporterit të KosovaPress-it, i cili ka qenë në vendin e ngjarjes, shumë pasagjerë janë ankuar se janë detyruar të paguajnë bileta për të dytën herë për t’u kthyer në vendet tyre të punës. Në mesin e pasagjerëve ka edhe shtetas zviceranë. E kontaktuar nga KosovaPress, zëdhënësja e Aeroportit Ndërkombëtar “Adem Jashari”, Valentina Gara, tha se vonesa në fluturime ka vetëm në një linjë fluturimi. “Është vonesë normale, në ora 17:40 është dashur të niset, ndërsa fluturimi po realizohet në ora 19:40. Vonesa prej dy orëve është shkaktuar nga kompania përkatëse ajrore”, tha ajo.

S'KA KOMENTE

PËRGJIGJU