Ulet ndjeshëm niveli i Fierzës, ndërpritet prodhimi

Niveli i ujit në Fierzë është ulur ndjeshëm për shkak të thatësirës së muajve të fundit, çka ka detyruar KESH të ndërpresë prodhimin dhe të nisë importin e energjisë.

Enti parashikon që për muajt janar-shkurt të importojw 50 % të sasisë së energjisë së kërkuar nga OSHEE për furnizimin me energji të konsumatorëve tarifore. Sipas të dhënave më të fundit, niveli aktual në Fierzë është 276.22 metër, nga 296 që është kuota maksimale. Në të njëjtën periudhë të një viti më parë, niveli në hidrocentralin e Fierzës kapi kuotën e 293 metrave, duke rritur rrezikun e përmbytjeve.

Por ato që kanë shënuar nivelin më të ulët të 10 viteve të fundit, janë prurjet në Fierzë që sipas KESH rezultojnë 130 m3/sek. Ndërsa Fierza ka ndërprerë prodhimin, dy hidrocentralet e tjera, Koman dhe Vau i Dejës punojnë por me kapacitet të reduktuar raporton Tch.

Sipas KESH, niveli në Koman është 171.05 metër ndërsa prurjet 68 m3/sek kurse në Vaun e Dejës, niveli është 73.99 metër ndërsa prurjet 15 m3/sek. Duke qënë se reshjet e muajit janar nuk pritet të kenë intensitet të lartë që mund të rrisin prurjet në nivelet mesatare shumëvjecare, KESH thotë se duhet të ruajë rezervën energjetike për të mos cënuar sigurinë e furnizimit të vendit me energji.

Në këto kushte kërkesa e OSHEE prej 880 GW për furnizimin me energji në këto dy muaj do të plotësohet duke reduktuar prodhimin e KESH në rreth 400 GW, 180 GW do të prodhohet nga HEC-et e vegjël ndërsa pjesa tjetër prej 300 GW do të kontrakohet përmes importit.

S'KA KOMENTE

PËRGJIGJU