Rosto viçi me qumësht, pjata që do t’ju bëjë të lëpini gishtat

Mishi është padiskutim një ndër ato produkte që nuk mungon kurrë në tryezën e shqiptarëve, pavarësishe se nutricionistët apo dietologët këshillojnë që të mos abuzohet me konsumin e tij.

Kjo lidhet ngushtë edhe me traditën kulinare të vendit tonë, e cila bazohet kryesisht tek brumërat dhe mishi.

Në recetën e sotme do t’ju tregojmë si të gatuani rosto, por jo nga ajo tradicionalja, rosto me qumësht që të lëpini gishtat.

Përbërësit për 6 persona:
1 kg filetë viçi • 300 ml qumësht me yndyrë – i vakët • 50 g pançetë në kubikë (jo e tymosur) • 1 lugë gjalpë • 1-2 gjethe dafine – mund të mos e përdorni, nëse nuk ju pëlqen • 3 lugë vaj ulliri • kripë, piper.

Përgatitja:

Mishin e shpojmë me majën e thikës në disa vende dhe te çdo e çarë, fusim një copë pançetë. E lyejmë me pak kripë e piper në të gjitha anët dhe e lidhim për së gjeri e për së gjati me spango kuzhine që të mos humbë formën gjatë gatimit.

Në një tigan të madh që mund të nxërë mishin për gjithë gjatësinë e tij, ngrohim gjalpin me vajin. Skuqim mishin për pak minuta, duke e rrotulluar me lugë që të krijojë kore nga të gjitha anët. Mjaftojnë 6-7 minuta, pasi e skuqim me flakë të lartë.

Hedhim qumështin bashkë me gjethet e dafinës, i vëmë kapakun dhe e lëmë në flakë të ulët për 60-70 minuta, por duke e rrotulluar herë pas here dhe nëse është nevoja, shtojmë qumësht. Bëjmë provën me majën e një thike dhe nëse nga mishi nuk del lëng rozë, ai është gati. Fikim zjarrin, heqim gjethen e dafinës, heqim mishin dhe e mbështjellim me letër alumini, ndërsa lëngun që ka mbetur, e vëmë në zjarr që të trashet ose nëse dëshironi mund të tresni 1-2 lugë të vogla niseshte dhe t’i përzieni me lëngun që ky të trashet më shumë.

Heqim spangon dhe e presim mishin në feta. E shoqërojmë me karota ose patate të furrës, ose sipas dëshirës.

S'KA KOMENTE

PËRGJIGJU