Rama u përgjigjet kritikëve për marrëveshjen: Nuk shkelëm kushtetutën, fitorja na shijon me PD përballë

Kryeministri Edi Rama ishte sot në Sauk në një takim me qytetarët. Gjatë fjalë së mbajtur ai u fokusua edhe njëherë tek marrëveshja mes tij dhe kreut të opozitës Basha. Rama deklaroi se me arritjen e marrëveshjes u sigurua pjesëmarrja e të gjithë qytetarëve. Po ashtu, ai theksoi se marrëveshja nuk shkel kushtetutën dhe asnjë ligj, ndaj dhe sipas tij, e vetmja datë ligjore ishte 25 Qershori.

“Ne arritëm të imponojmë ndryshimet kushtetuese edhe pse nuk kishim shumicën e nevojshme, edhe Vettingun që zhbllokohet. Ja dolëm që PD të kthehet në zgjedhje, se ne kemi thënë gjithmonë, i duam në zgjedhje sepse duam të gjithë qytetarët në zgjedhje. I duam në zgjedhje sepse na shijon më shumë fitorja ballë për ballë se sa duke i lënë në çadër. Ajo që është e rëndësishme është se ne nuk shkelëm kushtetutën, nuk shkelëm as ligje kur shtymë me 1 javë datën e zgjedhjeve, ishte e vetmja shtyrje e mundshme ligjore. Ne besojmë që nëse u themi njerëzve që duam të bëjmë shtet, duhet të jemi të parët që respektojmë ligjin. Nëse u themi njerëzve që jemi të gjithë të barabartë para ligjit, jemi të parët që duhet të sillemi si të barabartë”, tha Rama.

Më tej ai kërkoi votën e qytetarëve për të çuar më tej reformat. Rama tha se nëse nuk duam të çbëjmë atë që është bërë këto vite të votohet PS.

“Nqs ju ka marrë malli për policë që hanë fara, votoni PD. Nëse ju ka marrë malli për një shkollë që mund të merrni diplomë pa frekuentuar, votoni PD. Nëse doni të fillojë historia  e maturës shtetërore që bëhet kopje shtetërore, shkoni votoni PD”, tha Rama më tej.

Kryeministri Edi Rama falënderoi Kreun e Bashkisë Erion Veliaj për transformimin e Tiranës gjatë këtyre dy viteve, duke sjellë një pamje krejt tjetër nga ajo e katër viteve të drejtimit të saj prej Lulzim Bashës. “ E falënderoj që ka ndryshuar Tiranën. Mu kujtua kur vija këtu të bëja fushatë si kryetar Bashkie.  Tani ka ndryshuar çdo gjë prej lali Erit. Luli e mori Bashkisë edhe pse ju nuk ia dhatë. Dhe si gjithmonë gjumë. Nuk punoi krahasuar me lali Erin. Me Veliajn, Tirana ka marrë gjithë ritmin që humbi”, tha Rama.

Kreu i Bashkisë Veliaj vlerësoi kryeministrin Rama për mbështetjen që i ka dhënë Bashkisë për kryerjen e investimeve për përmirësimin e infrastrukturës dhe të rritjes së cilësisë së shërbimit ndaj qytetarëve. “Sot e kemi shumë më kollaj të bëjmë urbanizim, e kemi shumë më kollaj të hedhim asfalt, e kemi shumë më kollaj të bëjmë lulishte, e dini pse? Qeveria e Edi Ramës thuajse ka legalizuar gjithçka, që ishte për të legalizuar në këtë njësi dhe në të gjithë Shqipërinë. Nëse në 4 vitet e Edit si kryeministër u legalizua 10-fish më shumë se ata të tjerët imagjinoni se çmund të bëjmë në 4 vitet e tjera për të përfunduar të gjithë procesin e legalizimeve. Nëse në 4 vite u arrit të zhbllokohet procesi i Vetingut dhe është çështje minutash përpara se Edi Rama të kthehet në Parlament për të votuar vettingunn dhe për t’i dhënë të gjithë shqiptarëve drejtësi”, tha Veliaj, Kreu i Bashkisë kërkoi mbështetjen e qytetarëve për të votuar PS në mënyrë që të vijojë mbështetjen për investimet në Tiranë.

/a.m.

S'KA KOMENTE

PËRGJIGJU