Meta kujton Arielën dhe Fildezin: Asnjë amnisti për të dënuarit për dhunë

Presidenti i Republikës, Ilir Meta ishte dje i pranishëm në koncertin e bamirësisë “Ende ka jetë”, i organizuar nga shoqata “Të ndryshëm dhe të barabartë”, me qëllim mbledhjen e të ardhurave për të ofruar shërbime për mbrojtjen dhe ri integrimin e viktimave të trafikimit dhe dhunës. Gjatë fjalës së mbajtur kreu i shtetit, duke u ndalur te rastet e dhunës, deklaroi se nuk duhet të ketë amnisti për të dënuarit për dhunë.

“Rastet e fundit tragjike, të Ariela Muratit dhe Fildez Hafizit, na bëjnë më të vetëdijshëm se që nga qeverisja qendrore, pushteti lokal, qendrat komunitare e sociale, organizatat për mbrojtjen e të drejtave të njeriut dhe çdo punonjës policie, prokuror e gjyqtar, të gjithë duhet të bashkëveprojmë për të parandaluar rënien viktimë të dhunës e trafikimit, të çdo vajze e gruaje shqiptare, të çdo të mituri apo personi në nevojë”.

“Gjatë mandatit tim si President i Republikës nuk do të trajtoj me falje të dënimit, asnjë person i cili është dënuar për dhunë në familje dhe njëkohësisht do kundërshtoj çdo amnisti të veprave penale të dhunës në familje apo të lidhura me to”, – theksoi ai.

Presidenti Meta apeloi për një bashkëveprim të ri e të fuqishëm të gjithë institucioneve në vend për të rritur fuqinë denoncuese ndaj çdo rasti dhune dhe ndëshkueshmërinë maksimale sipas ligjit ndaj këtyre kriminelëve që po trondisin themelet e shoqërisë dhe familjes shqiptare./a.m.

S'KA KOMENTE

PËRGJIGJU