Nga Ilva Tare
Pas rrëfimit në emisionin televiziv “Top Show” të një vajze e njohur si “eskortë luksi” e klientëve të pasur në Dubai, në rrjetet sociale kanë shpërthyer komente dhe reagime sa emocionale aq edhe të cuditshme. Them të cuditshme pasi ekzistenca e një linje të tillë vajzash të bukura që udhëtojnë për në Dubai me destinacion shoqerimin e meshkujve është sekret publik për të paktën dy vitet e fundit. Sjellja në vëmendje të publikut e këtij fenomeni bëri që më në fund të flitet hapur edhe për mënyrën e funksionimit dhe përfitimin financiar që sipas dëshmisë televizive arrin edhe 1500 euro nata.
Cfarë më duket e habitshme në komentet online është habia që tregojnë gratë dhe burrat që diskutojnë për ekzistencën e përfitimeve të tilla në këmbim të shoqërimit me klientë të pasur brenda dhe jashtë vendit. Kaq e vështirë ka qenë për shoqërinë shqiptare të kuptojë se të rinjtë e sotëm jetojnë jashtë mundësive të tyre, apo edhe të familjeve. Sa e mundur është që një 20 vjecare të zotërojë një makinë të sapo dalë nga fabrika që kushton me dhjetra mijëra euro. Po veshjet me cmime disa mijë euroshe që dominojnë rrugët e bllokut ku sigurohen?
Nëse të rinjtë, vajza apo djem qofshin do të punonin, sic ndodh në perëndim, do të kishin mundësi të paguanin shpenzimet e jetesës dhe shkollimin. Por asesi nuk do të ishin në gjendje që të jetonin në luks apo të konkurronin me njëra tjetrën për koleksionin e fundit të markave më të shtrenjta të këpucëve dhe veshjeve. Po shpenzimet për jetën e natës që nis të hënën dhe vazhdon deri të hënën tjetër a do të mund të përballoheshin nëse të ardhurat do të vinin nga një punë e siguruar në Tiranë? Edhe sikur të kishte të rinj kaq të mirëpaguar, puna dhe orët e gjata do të ishin aq të lodhshme saqë baret e natës do të vuanin për klientë dhe nuk do të mbusheshin edhe në ditët e javës si në fundjavë.
Problemi I vërtetë që duhet diskutuar nga shoqëria është modeli që rinia shqiptare ka zgjedhur për të siguruar mirëqenie dhe marrëdhënia me paranë. Sa të varur janë të rinjtë nga modeli i fundit I celularit, makinës, koleksionit të modës dhe a është e shëndetshme apo sipërfaqësore një qasje e tillë ndaj mënyrës së si duhet konceptuar jeta. Unë nuk besoj se të gjithë të rinjtë që kanë mundësi përtej punës së tyre për të jetuar në luks shkojnë në Dubai. Paradat që shohim rrugëve të Tiranës nuk mundësohen vetëm nga udhëtimet e shoqërimit jashtë.
Ka shumë të reja që e kanë gjetur Dubain e tyre në Tiranë dhe që ka gjasa të jenë të xhelozuara nga shoqet e tyre që nuk e kanë patur atë fat. Ka shumë raste kur lidhjet kthehen në biznes në kurriz të moralit dhe për këtë jo vetëm nuk ka debat, por inkurajohen dhe duartrokiten si zotësi e kombinuar me bukuri fizike. Thënë këtë, dua të besoj fort se zgjedhjen për luksin si shkëmbim për shoqërime nuk e kanë bërë të gjithë të rinjtë. Ka nga ata që I shoh me admirim të përpiqen për t’u shkolluar, për të gjetur një vend pune dhe që I shohin me bezdi lokalet e natës të mbipopulluara edhe gjatë ditëve të javës.
Këta mbase nuk janë shumicë, por nëse shoqëria I motivon dhe promovon atëherë do të flitet më pak për eskortat dhe më shumë për të rinjtë e ekselencës, nga ata që edhe në kafe marrin libër me vete. Kur një e njohura ime u kthye nga Oxford-I për pushimet e verës dhe ulej e vetme në kafe e shoqëruar nga leximet e saj, mësova se shumë vetë me gjasë nga kategoria e eksortave kishin menduar se asaj I kishte bërë dëm Anglia. Të dëmtuarit e vërtetë janë ende të dehur nga joshja e luksit dhe e kanë të pamundur të refuzojnë sheikët e Tiranës, por shpresa është se shumë shpejt ata do të jenë në minorancë jo vetëm si numër por edhe si mentalitet.
